«Աշխարհի խոշորագույն քաղաքների բիլբորդեր: Որքա՞ն արժե նման հաճույքը»

  Երբևէ Ձեզ հարցրել եք, թե որքա՞ն արժեն այն հսկայական գովազդային վահանակները, որոնք տեղակայված են խոշոր քաղաքների բանուկ խաչմերուկներում: Եթե նույնիսկ դա Ձեզ հետաքրքրել է, ուրեմն շատ հավանական է, որ Դուք կարծել եք, որ դրանք բավականին թանկ են՝ թանկարժեք գովազդ, որ կարող են իրենց թույլ տալ միայն համաշխարհային բրենդները: Սակայն առավել որոշակի պատկերացում նման գովազդային վահանակների (բիլբորդերի) գների մասին հավանաբար չունեք:  Ես Ձեզ կասեմ մոտավորապես ինչ գների մասին է խոսքը, մի քանի քաղաքների օրինակով, իսկ Դուք փորձեք հաշվել նման գովազդային արշավների վրա ծախսվող ամբողջ բյուջեն:

Եվ այսպես, սկսենք աշխարհի խոշորագույն քաղաքներից մեկից՝ Տոկիոյից:

  Շիբույա թաղամասը համարվում է Տոկիոյի 23 հատուկ  թաղամասերից մեկը, մոտավորապես 208 370 բնակչությամբ, բնակչության խտությունը 13 790 մարդ/կմ^, թաղամասը ընդգրկում է 15.11 կմ²  տարածք: Թաղամասի ամենաբանուկ հատվածներից մեկն է JR Հատիկո երկաթուղու Շիբույա կայարանը և նրան հարող խաչմերուկը: Այս կայարանը օրական ունենում է 2 188 000 ուղևորներ՝ շուրջօրյա ռեժիմով: Նրանց թվին են, ինչպես բիզնեսմեններ, ուսանողներ, այնպես էլ հասարակ մարդիկ:

   Ըստ Magna Global մեդիաբայինգի տնօրեն Ցույոշի Կանեդայի խոսքերի, այս խաչմերուկը լավագույն տեղն է ահռելի բիլլբորդերում գովազդի տեղադրման համար: Այս խաչմերուկում ամեն անգամ լույսը փոխվելիս փողոցը հատում է 2500 տաղամարդ և կին, հետևաբար ամբողջ օրվա կտրվածքով այն կկազմի մոտ 1 000 000 մարդ:: Այստեղ հսկայական նեոնային լույսերով բիլբորդերի արժեքը հասնում է 23 000 000 ճապոնական յեն, որը համարժեք է 195 000 ԱՄՆ դոլարին`՝ ընդամենը 2 շաբաթ գովազդվելու համար:

  Նկարում ցուցադրած շարժական գովազդային վահանակները կախված ցուցադրության հաճախականությունից և տևողությունից տարբեր են: Վահանակի չափսերը 6.48մ X 8.64մ, այսինքն՝ 55.99 մ²:    Կախված 15 վայրկյան տևողության ընթացքում 4 կամ 8 անգամ հոլովակի ցուցադրությունը 1- 3 օրվա համար կազմում է 270 000 – 500 000 ճապոնական յեն, որը համարժեք է մոտավորապես՝ 2500 -4800 ԱՄՆ դոլարին: 7 օրվա ցուցադրության արժեքը կկազմի համապատասխանաբար 630 000- 1 160 000 յեն կամ 6000 – 10 000 դոլար, իսկ 30 օր ցուցադրության համար՝ 1 840 000- 3 500 000 յեն կամ  16 000 – 33 000  ԱՄՆ Դոլար: Դե Դուք  մոտավորապես հաշվեք երկարատև գովազդվելու արժեքները:

  Հաջորդ ճապոնական մեծ քաղաքներից է Օսական: Շինսաիբաշի թաղամասում, հյուսիսային ճակատը նայող շարժական գովազդային վահանակի ամսական վաձույթը արժե 12 300 000 կամ 10 000 ԱՄՆ դոլար, որը ունի 30.3մ X 10.7մ չափսեր: Դրան նաև պետք է 8 % հարկ գումարել:

  Հաջորդ քաղաքը, որը ուզում եմ օրինակ բերել, Կոբեն է: Նմանատիպ շարժական վահանակներ վաձակալելու համար շատ հաճախ հայտնի բրենդները կնքում են երկարատև պայմանագրեր, կարծես թե «սեփականաշնորհելով» տարածքը, որպեսզի մարդկանց աչքն էլ սովորի՝ նույն տեղում նույն բրենդի գովազդը տեսնելով: Այդ պատճառով սովորաբար գովազդատուները առաջարկում են երկարատև պայմանագրեր; Օրինակ ամենաբանուկ խաչմերուկներից մեկում՝ Մոտոմաչի խաչմերուկում 6.44մ X 3.82մ, 24.6 մ²  շարժական գովազդային վահանակի արժեքը 3 տարվա կտրվածքով վարձակալելու համար, արժե՝ 9 000 000 յեն կամ  մոտավորապես 75 000 ԱՄՆ դոլար (հարկերը կրկին ներառված չեն):

 Հաջորդ խոշորագույն և թանկ «գովազդային տարածք» կարելի է համարել Լոնդոնի Պիկադալի հրապարակը ( Picadilly Circus ): Մի քանի հետաքրքիր փաստ արձանագրենք:

• Այստեղ ամենաերկար (կարծում եմ նաև շատ այլ տեղերում) գովազդատուն համարվում է Coca -Cola-ն ՝ այն գովազդվել է 1955 թվականից սկսած:
• Ճապոնական տեխնոգիգանտ TDK բրենդը այստեղ հայտնվել է 1990 թվականից սկսած, զբաղեցնում է 101.3 մ²:
• Առավել մեծ տարածքներ այստեղ զբաղեցնում են Samsung-ը, McDonald’s-ը, TDK(The Curve)-ը, Coca-Cola-ն, Hyunadai-ն:
• Վերջին 100 տարիների ընթացքում մոտավորապես 50 բրենդ արդեն ցուցադրվել են այս հրապարակում:
• Պիկադալի հրապարակի այցելուների 50%-ից ավելին արտասահմանցիներ են (հնգյակի մեջ են մտնում ԱՄՆ, Ֆրանսիան, Գերմանիան, Իտալիան, Իսպանիան ):
• Շաբաթական լսարանը այստեղ կազմում է 2 միլիոն մարդ:
• Վերջերս այստեղ հայտնված Hyundai բրենդը (2011 թվականից սկսած) վճարում է 2 000 000 ֆունտ ստեռլինգ իր տեղի համար: 

   Մյուս խոշորագույն քաղաքը Նյու Յորքն է: Նյու Յորքի համար պարզապես նշեմ, որ Ձեզանից կպահանջվի տարեկան  1 000 000- 4 000 000 միլիոն դոլար, եթե Դուք ցանկանաք գնել  նեոնային լուսավորության կամ թվային գովազդային վահանակներից որևէ մեկը, որոնք լուսավորում են Թայմս Հրապարակը (Times Square): Այստեղ կրկին խոշոր բրենդներն են՝ Toshiba-ն, TDK-ն, Dunkin Brands-ը և այլն:

   Աշխարհի ամենամեծ բիլբորդը տեղակայված է Սաուդյան Արաբիայում՝ Քինգ Խալիթ (King Khalid) օդանավակայանի մոտ ՝ 250 մ² մակերեսով, և ընդգրկում է ամբողջ երթևեկության տեսադաշտը:

  Առջևում սպասեք նաև բիլբորդներին ներկայացվող պահանջների և դրանցում առկա բացթողումների մասին հոդվածին:

Եթե հավանեցիք նյութը, կիսվեք Ձեր ընկերների հետ: